धक्कादायक! १३ लाख भारतीयांच्या डेबिट-क्रेडिटचा डेटा लीक

बेंगळुरू: डेबिट आणि क्रेडिट कार्ड वापरणाऱ्या भारतीयांसाठी धक्कादायक बातमी आहे. जवळपास १३ लाख भारतीयांच्या क्रेडिट आणि डेबिट कार्डची माहिती लीक झाली आहे आणि जोकर स्टॅश नावाच्या वेबसाइटवर कार्डची विस्तृत माहिती ऑनलाइन विकली जात असल्याचं समोर आलं आहे. एडीएम मशीन किंवा पॉइंटऑफ सेल मशीनचा वापर करताना कार्डवर लावण्यात आलेल्या मॅग्नेटिक पट्टीला स्किम करून यूजरच्या कार्डचा डेटा चोरला असल्याचं सांगितलं जात आहे. सिंगापूरची सायबर डेटा विश्लेषण करणारी प्रसिद्ध संस्था आयबीच्या माहितीनुसार, जोकर स्टॅशवर १३ लाख बँक कार्डचा डेटा ऑनलाइन विकला जात आहे. यातील ९८ टक्के कार्ड डिटेल्स भारतातील आहे. सप्टेंबर २०१९पर्यंत भारतात डेबिट आणि क्रेडिट कार्ड मिळून एकूण ९.७१७ कोटी कार्ड संचालित करण्यात आले आहेत. ट्रॅक वन आणि ट्रॅक टू या प्रकारातील डेटा हॅकर्सकडून विकला जात आहे. ऑनलाइन ट्रान्झॅक्शनसाठी किंवा क्लोनिंगसाठी त्याचा वापर केला जातो. ग्रुप आयबीच्या तज्ज्ञांनी केलेल्या चौकशीत अनेक धक्कादायक बाबी समोर आल्या आहेत. १०० डॉलरला (अंदाजे ७ हजार रुपये) प्रत्येक कार्डचा डेटा विकला जात आहे. आयबीचे संस्थापक आणि सीईओ इलिया सचकोव्ह यांनी सांगितलं की, 'यासंबंधी संबंधित अधिकाऱ्यांना सूचना देण्यात आल्या आहेत. भारतीय बँकांच्या कार्डची माहिती विकली जात असल्याचा हा गेल्या बारा महिन्यांतील पहिलाच प्रकार आहे. संबंधित सर्व अधिकाऱ्यांना सूचना देण्यात आल्या आहेत.' 'युरोप आणि उत्तर अमेरिकेतील अन्य देशांमध्ये बँका आणि पैसे अदा करणाऱ्या कंपन्यांना एका कायद्यानुसार लॉ एन्फोर्समेंट, रेग्युलेटर आणि ग्राहकांना डेटा चोरीला गेल्याच्या २४ तासांच्या आत माहिती देणे अनिवार्य करण्यात आले आहे. मात्र, भारतात कधीतरीच ग्राहकांना आपल्या खात्यासंबंधी किंवा कार्डची माहिती लीक झाल्याची माहिती दिली जाते. तीही सर्वात शेवटी ही माहिती दिली जाते,' असं डेटा सेक्युरिटी काउंसिल ऑफ इंडियाच्या एका अधिकाऱ्यानं सांगितली. दरम्यान, आयबीनं कोणत्याही बँकेचं नाव उघड केलं नाही. मात्र, १८ टक्के कार्ड हे एकाच बँकेचं असल्याचं सांगितलं जात आहे.

from Computer News in Marathi: Latest Computer Technology Updates in Marathi | Maharashtra Times https://ift.tt/322p90Q