व्हॉट्सअ‍ॅपवर हे टाळा, अन्यथा तुरूंगाची हवा!

- टेक्नोकांत व्हॉट्सअ‍ॅप हे देशातील एक सर्वाधिक चॅटिंग अॅप आहे. तर सोडाच पण राजकारणी, कार्यकर्ते, सर्वसामान्य लोक आणि गुन्हेगारही या व्हॉट्सअ‍ॅपचा उपयोग करतात. या गुन्हेगारी प्रवृत्तीच्या लोकांमुळेच की काय, व्हॉट्सअ‍ॅप हे कायद्याचं रक्षण करणाऱ्या सर्वच संस्थांची डोकेदुखी ठरलं आहे. एखाद्या व्यक्तीची बदनामी करणे, खोट्या बातम्या पसरवणं, पॉर्न क्लिप्स पाहणे, इतकंच काय पण जमावावर हल्ला करण्यासाठीही व्हॉट्सअ‍ॅपचा वापर केला जातोय. व्हॉट्सअ‍ॅपमधल्या ‘एंड-टू-एंड एनक्रिप्शन’च्या सोयीमुळे आपलं कोणीही काही वाकडं करू शकणार नाही या मुजोरीमुळे वापरकर्त्यांना अजिबात भीती राहिलेली नाही. त्यातच अशा संदेशांचा स्रोत शोधणे हे पोलिसांसाठी त्रासदायक बनले आहे. मात्र, एनक्रिप्नशची ढाल आपल्याला वाचवेल अशी जर कोणाची गोड समजूत असेल, तर त्यांचे काही खरं नाही, हे त्यांनी आधीच ध्यानात घ्यावं. कारण व्हॉट्सअ‍ॅपच्या प्रत्येक वापरकर्त्याचा मेटाडेटा फेसबुककडे साठत असतो. व्हॉट्सअ‍ॅपची मालकी आता फेसबुककडे आहे, हे सुज्ञास वेगळं सांगायला नको. त्यामुळं कायद्याचे रक्षण करणाऱ्या संस्थांनी अशा काही गुन्हेगारी स्वरुपाचे संदेश पाठवणाऱ्यांचा शोध घ्यायचे ठरवले आणि तशी मागणी त्यांनी फेसबुककडे केली, तर फेसबुक ती देऊ शकते. हे मेसेजेस एनक्रिप्ट केलेले असतानाही, पोलिसांना ते हवे असल्यास त्यांना वापरकर्त्याचे नाव, आयपी अॅड्रेस, मोबाइल नंबर, लोकेशन, मोबाइल नेटवर्क आणि त्याचा मोबाइल हँडसेट प्रकार अशी इत्थंभूत माहिती मिळू शकेल. तो वापरकर्ता कोणाबरोबर गप्पा मारत होता. किती वेळ आणि कोणत्या वेळेस त्याने हे मेसेज पोस्ट केले, हे सर्व पोलिसांना कळू शकेल. इतकंच नाही, तर पोलिसांना त्या व्यक्तींच्या कॉन्टॅक्ट लिस्टची माहितीही मिळू शकते. व्हॉट्सअ‍ॅप वापरकर्त्यांसाठी देशात स्वतंत्र कायदे नसले, तरी माहिती तंत्रज्ञान अधिनियम, २००० अन्वये खालील काही गोष्टी केल्यास पोलिस तुम्हाला व्हॉट्सअॅप पोस्टच्या आधारावर अटक करू शकतात. या गोष्टी कोणत्या त्या आपण पाहू... - एखाद्या व्हॉट्सअ‍ॅप ग्रुपवरील कोणी सदस्य काही बेकायदेशीर कृती करताना आढळून आले, तर अशा संशयास्पद ग्रुप अॅडमिनवर पोलिसांकडून पाळत ठेवली जाऊ शकते आणि त्यात तथ्य आढळल्यास त्यांना तुरुंगाची हवाही खावी लागू शकते. - पॉर्न क्लिप विशेषतः बालकांच्या पॉर्न क्लिप्सचा प्रसार करणे, फोटो किंवा अश्लील साहित्याचा प्रसार करणंही महागात पडू शकते. प्रसंगी अटकही होऊ शकते. - महत्त्वाच्या व्यक्तींचे मॉर्फ केलेले फोटो पसरवणे, मॉर्फ व्हिडीओ पसरवणे हेदेखील धोकादायक आहे. यामुळेही अटक केली जाऊ शकते. - एखाद्या महिलेने जर एखाद्या व्यक्तीविरुद्ध त्याने व्हॉट्सअ‍ॅपवरून आपला मानसिक छळ चालवला आहे, अशी तक्रार केली तर त्या व्यक्तीला पोलिस तुरुंगात टाकू शकतात. - एखाद्या व्यक्तीच्या नावे व्हॉट्सअ‍ॅपवर बनावट अकाऊंट उघडले तरी तो गुन्हा आहे आणि यासाठी संबंधित व्यक्तीला अटक होऊ शकते. - एखाद्या धर्माबद्दल किंवा प्रार्थनास्थळाबद्दल द्वेष पसरवणारे किंवा भडकावणारे मेसेज पसरवणेही संबंधिताला तुरुंगात घेऊन जाऊ शकेल. अशा मेसेजसाठीही पोलिस संबंधीत व्यक्तीला अटक करू शकतात. - संवेदनशील विषयांबाबत खोट्या बातम्या पसरवणे किंवा व्हिडीओ क्लिप, फोटो आदींचा प्रसार करणंही संबंधित व्यक्तींना अडचणीत आणू शकते. - व्हॉट्सअ‍ॅपच्या माध्यमातून अमली पदार्थ विकणे किंवा प्रतिबंधित वस्तूंची विक्री केल्यास पोलिसांचे लक्ष अशा व्यक्तींकडे जाऊ शकेल आणि त्यामुळं त्यांना तुरुंगाची हवा खावी लागेल. - लपवलेल्या कॅमेऱ्यातून बनवण्यात आलेल्या सेक्स क्लिपचा प्रसार किंवा बेकायदेशीररित्या बनवण्यात आलेल्या लोकांच्या व्हिडीओ क्लिप्स पसरवणंही बेकायदेशीर आहे. त्यामुळंही संबंधितांना अटक होऊ शकते.

from Latest Mobile Phones: Mobile News, Latest Mobile News in Marathi | Maharashtra Times https://ift.tt/2snoTxY