नवी दिल्ली: बेबसाईटद्वारे ऑनलाइन वस्तू खरेदीत फसवणूक होत असल्याच्या घटनांमध्ये दिवसेंदिवस वाढ होताना दिसत आहे. असेच एक ऑनलाइन फसवणुकीचे प्रकरण समोर आले आहे. एका ई-कॉमर्स वेबसाइटद्वारे ग्राहकाला ११ प्रो खरेदी करणे चांगलेच महागात पडले आहे. याचे कारण म्हणजे या ऑनलाइन ग्राहकाला आयफोन ऐवजी बनावट अँड्रॉईड फोन पाठवण्यात आला. हे पाहून या ग्राहकाला धक्काच बसला. रजनीकांत कुशवाह असे फसवणूक झालेल्या ग्राहकाचे नाव असून बेंगळुरूचा रहिवासी असलेला रजनीकांत हा व्यवसायाने सॉफ्टवेअर इंजिनीअर आहे. रजनीकांत कुशवाह यांनी देशातील लोकप्रिय ई-कॉमर्स प्लॅटफॉर्मवरुन आयफोन ११ प्रो स्मार्टफोन मागवला होता. प्रीपेड पेमेंटद्वारे त्याने ही ऑर्डर केली होती आणि त्यासाठी त्याने ९३ हजार ९९० रुपये भरले होते. रिअर कॅमेऱ्याच्या जागी होता स्टिकर फोनचे पार्सल आपल्या घरी आलेले पाहून रजनीकांत खूश होता. कारण त्याच्या स्वप्नातील लेटेस्ट आयफोन त्याच्या हातात येणार होता. मात्र, हे पार्सल उघडल्यावर त्याला धक्का बसला. कारण त्याने पार्सल उघडून पाहिले तेव्हा फोनच्या मागे ट्रिपल रिअर कॅमेरा असल्याचे भासवण्यासाठी स्टीकर चिकटवण्यात आले होते. शिवाय या फोनचे सॉफ्टवेअरही आयओएस नाही आणि त्यामध्ये अँड्रॉइड अॅप्स आधीपासूनच अस्तित्वात आहेत असे रजनीकांतला आढळले. आपली फसवणूक झाल्याचे लक्षात आल्यानंतर रजनीकांतला खूप मानसिक त्रास झाला. याला थर्ड पार्टी जबाबदार रजनीकांत यांनी हा फोन लखनऊमध्ये मागवला होता. ई-कॉमर्स प्लॅटफॉर्मच्या माध्यमातून झालेल्या फसवणूकीमागे थर्ड पार्टी कंपनी आणि विक्रेते असल्याचे रजनीकांतला वाटते. बनावट आयफोन ११ प्रो मिळताच त्याने ई-कॉमर्स कंपनीकडे याची तक्रार केली. मात्र, कंपनीकडून फोन रिप्लेसमेंटचे आश्वासन मिळाल्यानंतर रजनीकांतला हायसे वाटले. यापूर्वीही घडल्यात अशा घटना ई-कॉमर्स प्लॅटफॉर्मवरुन एखाद्या ग्राहकाला बनावट उत्पादन मिळाण्याची ही पहिली वेळ नाही. यापूर्वी अशा अनेक घटना घडल्या आहेत. अनेक ग्राहकांना फोनऐवजी साबण, आंबा, वीट आणि दगड मिळाल्याची अनेक उदाहरणे प्रसिद्ध आहेत.
from Latest Mobile Phones: Mobile News, Latest Mobile News in Marathi | Maharashtra Times https://ift.tt/2LOWw2f
Comments
Post a Comment