शाओमीने आणला स्वस्त ई-बूक रिडर

नवी दिल्ली : स्मार्टफोन मार्केटमध्ये स्वतःचा दबदबा निर्माण केलेल्या शाओमीने आता नव्या क्षेत्रात पाऊल टाकलं आहे. कंपनीने चीनमध्ये पहिला ई-बूक रिडर लाँच केला आहे. हा अमेझॉन किंडलशी अगदी मिळता-जुळता आहे. Xiaomi Mi Reader असंख्या फाइल फॉरमॅटला सपोर्ट करतो, असा दावा कंपनीने केला आहे. शिवाय याची किंमतही अमेझॉन किंडलपेक्षा कमी ठेवण्यात आली आहे. क्राऊडफंडिंग स्टेजमध्ये असलेल्या या ई-रिडरची किंमत चीनमध्ये ५७९ युआन म्हणजे जवळपास ५९०० रुपये आहे. इच्छुक ग्राहकांना हा ई-रिडर २० नोव्हेंबरपासून खरेदी करता येईल. विक्री सुरू झाल्यानंतर या ई-रिडरची किंमत ५९९ युआन म्हणजेच ६१०० रुपये होईल. या प्रोडक्टच्या ओपन सेलबाबत कंपनीने अजून कोणतीही घोषणा केलेली नाही. या प्रोडक्टची तुलना अमेझॉन किंडलशी केली जात आहे. कारण, अमेझॉन किंडलचीही प्राथमिक किंमत ७९९९ रुपये आहे. त्यामुळे शाओमीने ई-रिडरची किंमत अमेझॉन किंडलपेक्षा कमी ठेवली आहे. चीनमध्ये हा ई-रिडर लाँच करण्यात आला असला तरी इतर देशात कधी उपलब्ध होईल याबाबतची माहिती कंपनीने अजून दिलेली नाही. शाओमीकडून सर्वसाधारणपणे चीनमध्ये लाँच केलेलं प्रोडक्ट इतर देशांमध्येही लाँच केलं जातं. त्यामुळे येत्या काही दिवसातच Xiaomi Mi Reader भारतातही उपलब्ध होईल, अशी अपेक्षा आहे. शाओमीच्या या ई-बूक रिडरमध्ये ६ इंच आकाराचा ई-लिंक डिस्प्ले देण्यात आला आहे, ज्याचं रिझोल्युशन १०२४x७६८ पिक्सेल आणि २१२ppi आहे. या डिव्हाईसमध्ये २४ प्रीसेट ब्राईटनेस लेव्हल देण्यात आली आहे, ज्यामुळे ब्राईट आणि डार्क या दोन्ही परिस्थितीमध्ये ९० टक्क्यांपर्यंत युनिफॉर्मिटी ब्राईटनेस कंफर्टेबल रिडिंग मिळेल. यामध्ये १.८Ghz क्वॉड कोर Allwinner B३०० प्रोसेसर, १ जीबी रॅम आणि १६ जीबी स्टोरेज देण्यात आलं आहे. Xiaomi Mi Reader मध्ये अँटी ग्लेयर फिनिश असून यामध्ये विविध फाईलला सपोर्ट केला जाईल. PDF, DOC, XLS, PPT, TXT, EPUD, WPS आणि मायक्रोसॉफ्ट ऑफिस फाईल्सचाही यामध्ये समावेश आहे. हे डिव्हाईस अँड्रॉईड ८.१ ओरियो सपोर्टेड आहे. यामध्ये १८००mAh क्षमतेची बॅटरी देण्यात आली आहे. चार्जिंगसाठी यूएसबी टाईप सी पोर्ट देण्यात आलं असून याचं वजन १७८ ग्राम असल्यामुळे वापरासाठी आणखी सुलभ आहे.

from Science & Technology News: Science News Updates, Science Technology News in Marathi | Maharashtra Times https://ift.tt/2CU9iaO