जिओला आव्हान, BSNL कॉलमागे ६ पैसे परत देणार

मुंबई : रिलायन्स जिओने नुकतंच इतर नेटवर्कवर कॉल करण्यासाठी सहा पैसे प्रति मिनिट शुल्क आकारण्यास सुरुवात केली आहे. यानंतर एअरटेल आणि व्होडाफोन यांनी संधीचा फायदा घेत ग्राहकांकडून आययूसी शुल्क न घेण्याचा निर्णय घेतला. आता सरकारी कंपनी बीएसएनएलनेही एक पाऊल पुढे टाकत नवी ऑफर आणली आहे. बीएसएनएल आपल्या ग्राहकांना प्रत्येक पाच मिनिटांच्या व्हॉईस कॉलवर सहा पैसे परत देणार आहे. प्रत्येक पाच मिनिटांच्या व्हॉईस कॉलनंतर ग्राहकांच्या खात्यात सहा पैसे परत केले जातील, असं बीएसएनएलने म्हटलं आहे. ही कॅशबॅक ऑफर देशभरातील बीएसएनएल वायरलाईन, ब्रॉडबँड आणि एफटीटीएच ग्राहकांना मिळणार आहे. आययूसी प्रकरण चर्चेत असतानाच बीएसएनएलने ही घोषणा केली. कंपनीला नवीन ग्राहक मिळण्याच्या रुपात या ऑपरचा फायदा होऊ शकतो, असं सांगितलं जात आहे. बीएसएनएलच्या घोषणेमुळे जिओला पुन्हा एकदा मोठा झटका बसला आहे. आपल्या दमदार ऑफरमुळे गेल्या दोन वर्षांपेक्षा अधिक काळ भारतीय दूरसंचार क्षेत्रात जिओने आपला दबदबा निर्माण केला. जिओमुळे इतर कंपन्यांनाही स्वस्त दरात डेटा आणि व्हॉईस कॉलिंगची सुविधा द्यावी लागली. पण नुकतंच जिओने इतर नेटवर्कवर फोन करण्यासाठी शुल्क आकारण सुरु केलं आहे. प्रति मिनिट सहा पैसे दर आकारण्याच्या निर्णयांमुळे जिओच्या ग्राहकांमध्ये नाराजीचं वातावरण आहे, ज्याचा फायदा इतर कंपन्या घेताना दिसत आहेत. जिओने आययूसीची घोषणा केल्यानंतर एअरटेल आणि व्होडाफोन या महत्त्वाच्या दोन कंपन्यांनी हे शुल्क न आकारण्याचा निर्णय घेतला. काही रिपोर्ट्सनुसार, जिओने शुल्क आकारणी सुरु केल्यानंतर जिओचे अनेक प्रीपेड ग्राहक दुसऱ्या कंपन्यांकडे वळले असल्याचं सांगण्यात येतंय. त्यातच बीएसएनएलने ही घोषणा करुन स्पर्धेत उडी घेतली आहे. जिओकडून शुल्क आकारणी कशामुळे ? कॉल टर्मिनेशन चार्जच्या नियमातील अनिश्चिततेमुळे व्हॉईस कॉलसाठी शुल्क आकारणार असल्याचं जिओने जाहीर केलं. जिओ ते जिओ कॉलिंग मोफत आहे. मात्र इतर नेटवर्कवर कॉलिंगसाठी प्रति मिनिट 6 पैसे शुल्क आकारलं जात आहे. मात्र ग्राहकांना या बरोबरीत डेटा देऊन समतोल साधण्याचा प्रयत्न केला जाणार आहे. दूरसंचार कंपन्यांना आपल्या ग्राहकाने इतर नेटवर्कवर फोन केल्यानंतर द्यावं लागणारं शुल्क जोपर्यंत कायम आहे, तोपर्यंत जिओकडूनही 6 पैसे प्रति मिनिट दराने शुल्क आकारलं जाईल, असं कंपनीने स्पष्ट केलं. हा चार्ज जिओच्या ग्राहकाने इतर नेटवर्कवर फोन केल्यास लागू असेल.

from Latest Mobile Phones: Mobile News, Latest Mobile News in Marathi | Maharashtra Times https://ift.tt/2Nsy8Dq