ऐतिहासिक! अंतराळात फक्त महिलांचा स्पेसवॉक

वॉशिंग्टन: अंतराळात दोन महिला अंतराळवीरांनी करून नवा इतिहास रचला आहे. यापूर्वी स्पेसवॉक करणाऱ्या टीममध्ये पुरुष अंतराळवीरांचा समावेश असायचाच. पहिल्यांदाच केवळ महिला अंतराळवीरांनी स्पेसवॉक करून नवा इतिहास घडवला असून क्रिस्टिना कोच आणि जेसिका मीर यांची जोडी अंतराळात स्पेसवॉक करणारी पहिली महिला जोडी ठरली आहे. आतापर्यंत अंतराळात ४२० स्पेसवॉक करण्यात आले आहेत. स्पेसवॉक करणाऱ्या प्रत्येक टीममध्ये पुरुष असायचेच. मात्र आज पहिल्यांदाच ४२१ वी स्पेसवॉक करण्याचा मान दोन महिला अंतराळवीरांना मिळाला आहे. या दोघीही नासाच्या अंतराळवीर आहेत. या दोघींचा स्पेसवॉक सुरू असून तब्बल साडेपाच तास हा स्पेसवॉक चालणार आहे. हा ऐतिहासिक स्पेसवॉक सुरू झाला तेव्हा आंतराळ केंद्रात असलेले सर्व चार पुरुष अंतराळवीर केंद्रातच थांबले. तर जेसिका आणि क्रिस्टिना या दोघी तुटलेला बॅटरी चार्जर बदलण्यासाठी अंतराळात केंद्राच्या बाहेर स्पेसवॉक करताना दिसल्या. अंतराळ केंद्राच्या चालक दलातील एका अंतराळवीराने गेल्या आठवड्यात अंतराळ केंद्राबाहेर नव्या बॅटरी बसवल्या होत्या. त्यावेळी बॅटरी चार्जर खराब झाला होता. नासाने ही समस्या सोडवण्यासाटी बॅटरी बदलण्याचं इतर काम तातडीने थांबवलं होतं. त्यानंतर या दोन महिला अंतराळवीरांना बॅटरी चार्जर बसवण्यास सांगण्यात आलं होतं. विशेष म्हणजे हे मिशन मार्चमध्ये सुरू होणार होतं. परंतु स्पेस एजन्सीकडे केवळ एकच मध्यम आकाराचा सूट होता. महिला आणि पुरुषांच्या कॉम्बिनेशन असणारा हा सूट होता. दरम्यान, या ऐतिहासिक घटनेनंतर नासाच्या जॉन्सन स्पेस सेंटरने ट्विट केलं आहे. आज ऐतिहासिक दिवस आहे. तुम्ही जिथे असाल तिथून तुमच्या शुभेच्छा आणि प्रोत्साहन द्या, असं या ट्विटमध्ये म्हटलं आहे. तर आंतरराष्ट्रीय अंतराळ केंद्रानेही एक व्हिडिओ शेअर केला आहे. त्यावर एक पोस्टही लिहिली आहे. स्पेसवॉकर क्रिस्टिना आणि जेसिका स्पेसच्या बाहेर उभ्या आहेत. बिघडलेल्या पॉवर कंट्रोलची दुरुस्ती करण्यासाठीची अवजारे त्या घेत आहेत, असं या ट्विटमध्ये म्हटलं आहे.

from Science & Technology News: Science News Updates, Science Technology News in Marathi | Maharashtra Times https://ift.tt/2VPKhpU