मोबाइलवर गेम खेळत रात्री झोपला; सकाळी मृत्यू

नवी दिल्लीः गेम खेळताना बॅटरी संपणार या भीतीपोटी मोबाइलला चार्जिंग लावून गेम खेळणाऱ्या एका २५ वर्षीय तरुणाला आपला जीव गमवावा लागल्याची धक्कादायक घटना उघडकीस आली आहे. रात्री गेम खेळत असताना या तरुणाला झोप लागल्याने ही दुर्दैवी घटना घडली आहे. सकाळी कुटुंबातील व्यक्तीनं त्याला उठवण्याचा प्रयत्न केला. परंतु, त्याचा रात्रीच्याच सुमारास मृत्यू झाला होता. थायलंडमध्ये ही धक्कादायक घटना घडल्याने मोबाइलचे दुष्परिणाम पुन्हा एकदा समोर आले आहेत. स्मार्ट जमान्यात स्मार्टफोनच्या गरजेचं रुपांतर व्यसनात कधी झालंय हे स्मार्टफोन वापरणाऱ्यांना अजूनही कळलेलं नाही. अवघ्या दीड-दोन वर्षाचा चिमुरडी मुला-मुलींपासून वयोवृद्ध आजी-आजोबांपर्यंत सध्या मोबाइलच्या व्यसनात बुडालेले पाहायला मिळतात. फेसबुक, ट्विटर, व्हॉट्सअॅप यासारख्या सोशल मीडियावर अॅक्टीव राहण्यासाठी लोक तासन तास मोबाइलमध्ये डोकावत असतात. शिवाय आता दुसरं काहीच नाही, अशीच धारणा अनेकांना झाली आहे. स्मार्टफोनमुळे तरुण पिढीवर तर त्याचे थेट दुष्पपरिणाम दिसायला लागले आहेत. थायलंडमधील एक २५ वर्षाचा तरुण मोबाइल चार्जिंगला लावून मोबाइलवर गेम खेळत होता. रात्री गेम खेळत असताना त्याला झोप लागली. फोन चार्जिंगला असल्याने बॅटरी फुल झाली व मोबाइलमध्ये करंट आल्याने या तरुणाचा शॉक लागून मृत्यू झाल्याचे सांगण्यात येत आहे. सकाळी कुटुंबातील व्यक्तीनं त्याचा दरवाजा उघडला त्यावेळी त्या तरुणाचा मृत्यू झाला होता. त्याचा हात जळाला होता. शरीराचा रंगही काळा पडला होता. या घटनेची माहिती मिळताच पोलिसांनी घटनास्थळी धाव घेतली व पंचनामा केला. या तरुणाचा मृत्यू शॉक लागून झाल्याची शक्यता पोलिसांनी वर्तवली आहे. हा तरुण नेहमी चार्जिंगला फोन लावून तासन तास मोबाइलवर गेम खेळत असायचा अशी माहिती कुटुंबातील व्यक्तींनी पोलिसांना दिली. मोबाइलमुळे एखाद्या व्यक्तीचा मृत्यू झाला, ही घटना पहिली नाही. याआधीही कझाकिस्तानमध्ये मोबाइल फोनमध्ये बॅटरीला आग लागल्याने एका १४ वर्षीय मुलीचा मृत्यू झाला होता. या मुलीनं फोन चार्जिंगला लावून उशीखाली ठेवला होता. मोबाइल चार्जिंगला लावल्यानंतर गरम होतो. फोन चार्जिंगला नसेल तरीही तो उशीखाली ठेवणे धोकादायक असते, असे सांगितले जाते.

from Latest Mobile Phones: Mobile News, Latest Mobile News in Marathi | Maharashtra Times https://ift.tt/2Is6DIs