'विक्रम'ला शोधण्यासाठी चंद्रावरील सकाळची प्रतिक्षा

बेंगळुरू: मोहिमेत महत्त्वाची भूमिका बजवू शकणाऱ्या विक्रम लँडरसोबत अद्यापही संपर्क होऊ शकला नाही. तर, इस्रोच्या संशोधकांनी हिंमत न हारता 'विक्रम'सोबत संपर्क साधण्याचे प्रयत्न सुरू आहेत. सात सप्टेंबर रोजी चांद्रयान २ मोहिमेचा महत्त्वाचा टप्पा पार पडणार होता. यावेळी विक्रम लँडर चंद्रावर सॉफ्ट लँडिंग करणार होता. मात्र, सॉफ्ट लँडिंगच्या अवघ्या काही मिनिटांआधी विक्रमसोबतचा संपर्क तुटला होता. त्यानंतर इस्रोकडून विक्रमसोबत संपर्क साधण्याचे जोरदार प्रयत्न सुरू आहेत. चंद्रावर विक्रम उतरणार असलेल्या भागात रात्र झाली असल्यामुळे १० दिवसांपूर्वीच इस्रोने आपले प्रयत्न स्थगित केले आहेत. दिवस उजाडण्याची प्रतिक्षा इस्रोचे अध्यक्ष के. सिवन यांनी आमचे प्रयत्न सुरूच राहणार असल्याचे सांगितले. आता विक्रमसोबत संपर्क साधणे शक्य नाही. सध्या त्या भागात रात्र सुरू आहे. त्यानंतरच आम्ही प्रयत्न सुरू करणार आहोत. चंद्रावर रात्रीची वेळ सुरू होणे म्हणजे लँडर अंधारात गेला असल्याचे सिवन यांनी सांगितले. आता चंद्रावर दिवस उजाडल्यानंतरच विक्रमसोबत संपर्क साधण्याचे प्रयत्न करण्यात येणार असल्याचे त्यांनी सांगितले. काही अंतराळ तज्ञ आणि संशोधकांच्या मते आता विक्रमसोबत संपर्क होणे अशक्य बाब आहे. इस्रोच्या एका अधिकाऱ्याने सांगितले की, जवळपास वीस दिवस उलटून गेल्यानंतर आता विक्रमसोबत संपर्क करणे कठीण आहे. मात्र, प्रयत्न करण्यास काहीही हरकत नसल्याचे या अधिकाऱ्याने सांगितले. चंद्रावर लँडिंग करत असताना विक्रम वेगाने चंद्रा भूपृष्ठावर आदळला असल्याची भिती आहे. असे असेल तर विक्रमच्या अंतर्गत भागाला धक्का बसला असण्याची दाट शक्यता असल्याचे या अधिकाऱ्याने सांगितले. 'चांद्रयान २' ही इस्रोची अतिशय महत्त्वाची मोहीम होती. चंद्राच्या दक्षिण ध्रुवावरील भागाचा अभ्यास करण्यासाठी ऑर्बिटर, लँडर आणि रोव्हर एकत्र पाठवण्यात आले होते. आतापर्यंत इतर देशांनी आपल्या चांद्र मोहिमेत उत्तर ध्रुवाकडील भागात यान उतरवले होते.

from Science & Technology News: Science News Updates, Science Technology News in Marathi | Maharashtra Times https://ift.tt/2nvc2qO