पडण्यापासून वाचवतं हे माणसाचं 'शेपूट'!

टोकियो: नवंनवं तंत्रज्ञान आणण्याच्या बाबतीत जपानी लोकांचा हात कोणी धरूच शकत नाही. आता तर काय म्हणे, जपानी वैज्ञानिकांनी एक कृत्रिम तयार केलंय. वृद्धांसाठी विशेषत: तयार केलेली ही शेपूट वृद्धांना पडण्यापासून वाचवणार आहे. सीहॉर्स म्हणजेच समुद्री घोड्यापासून प्रेरणा घेऊन ही शेपटी तयार केली आहे. हे शेपूट माणसाचा तोल सावरण्यास मदत करतं. 'आर्क्यू' असं या शेपटीचं नाव आहे. हे डिव्हाइस कमरेला बांधलं जातं. जास्त वजन उचलून चालू लागण्यावर पडण्याचा धोका असतो, तो धोका हे शेपूट कमी करण्याचं काम करणार आहे. जपानमध्ये वृद्धांची वाढती संख्या ध्यानात घेऊन असे विविध आविष्कार केले जात आहेत. वृद्धांची वाढती संख्या ही तेथील सरकारने 'राष्ट्रीय आपत्ती' म्हणून जाहीर केली आहे. याआधीही २०१२ साली एका जपानी कंपनीने 'शिप्पो' नावाचं कृत्रिम शेपूट तयार केलं होतं. हे शेपूट मेंदूतील लहरींचा सेंसरप्रमाणे वापर करून त्यानुसार काम करते. कियो विद्यापीठाच्या तज्ज्ञांचं म्हणणं आहे की ७१ से.मी. लांब असलेलं हे 'आर्क्यू' शेपूट कृत्रिम मांशपेशींनी तयार केलंय. याची लांबी कमीजास्त करता येते. या शेपटीत असलेला बॉडी ट्रॅकर व्यक्तीच्या ग्रॅव्हिटीचा माग काढतो. जर व्यक्तीचं गुरुत्वाकर्षण केंद्र त्या व्यक्तीपासून दूर असेल, म्हणजेच जेव्हा ती व्यक्ती पडण्याच्या बेतात असेल तेव्हा हे शेपूट तिचा तोल सावरतं.

from Science & Technology News: Science News Updates, Science Technology News in Marathi | Maharashtra Times https://ift.tt/2KwrHhf