चांद्रयान-२ उद्या अवकाशात झेपावणार, काउंटडाऊन सुरू

श्रीहरिकोटा: भारताच्या मोहीमेला अवघे काही तास उरले आहेत. उद्या १५ जुलै रोजी पहाटे २ वाजून ५१ मिनिटांनी श्रीहरिकोटा येथील सतीश धवन स्पेस सेंटर येथून GSLV मार्क-३च्या मदतीने अवकाशात झेपवणार आहे. लॉन्चिंग नंतर ५२ दिवसाने चांद्रयान-२ चंद्रावर पोहोचेल. इस्रोच्या या महत्त्वकांशी मोहीमेकडे केवळ भारताचेच नव्हे तर जगाचेही लक्ष लागले आहे. सोमवारी पहाटे २ वाजून ५१ मिनिटांनी चांद्रयान-२ ला भारतातील सर्वात शक्तिशाली रॉकेट GSLV मार्क-३च्या मदतीने लॉन्च केलं जाणार आहे. लॉन्चिंगनंतर चांद्रयान पृथ्वीच्या कक्षेत पोहोचेल. १६ दिवस पृथ्वीची परिक्रमा केल्यानंतर चांद्रयान चंद्राच्या दिशेने जाईल. या दरम्यान चांद्रयानाचा वेग अधिकाधिक १० किलोमीटर प्रति सेकंद आणि कमीत कमी ताशी ३ किलोमीटर असेल. लोकांना या ऐतिहासिक क्षणाचा साक्षीदार होण्यासाठी इस्रोने गेल्या काही दिवसांपासून थेट प्रक्षेपण दाखवण्याची सोय उपलब्ध करून दिली आहे. यासाठी एका खास गॅलरीची तयार करण्यात आली आहे. या गॅलरीत १० हजार लोक बसू शकतात. तुम्हालाही या चांद्रयान-२चे प्रक्षेपण पाहायचे असेल तर तुम्ही या लिंकवर जाऊन नोंदणी करू शकता. चांद्रयान-१ नंतर १० वर्षांनी इस्रोची ही चांद्रयान मोहीम होणार आहे. २००९ मध्ये पाठवलेल्या चांद्रयानात चंद्राच्या कक्षेत फिरणारं ऑरबिटर होतं. पण चंद्राच्या पृष्ठभागावर फिरून संशोधन करणारं रोव्हर त्यावेळी नव्हतं. यावेळी मात्र या यानाचं रोव्हर थेट चंद्रावर उतरणार आहे. आता चांद्रयान-२ मोहिमेमधलं रोव्हर जेव्हा चंद्राच्या दक्षिण ध्रुवावर उतरेल तेव्हा चंद्राची आणखी रहस्यं उलगडता येतील. चंद्राच्या कक्षेत प्रवेश केल्यानंतर त्याचे ऑर्बिटर, लँडरपासून वेगळे होईल. त्या नंतर लँडर चंद्राच्या जमिनीवर उतरेल आणि रोव्हर वेगळा होईल. ऑर्बिटरमध्ये अनेक संवेदनशील उपकरणे, कॅमेरे आणि सेंसर्स असणार आहेत. अशाच प्रकारे रोव्हर देखील अत्याधुनिक उपकरणांनी युक्त असेल. ऑर्बिटर आणि रोव्हर चंद्राच्या पृष्ठभूमीवरील खनिजे, आणि इतर पदार्थांचे डेटा पाठवण्याचे काम करतील. वैशिष्ट्ये >> चांद्रयान-२ एकूण १२ भारतीय उपकरणे घेऊन जाणार आहे. >> चांद्रयान-२ चे वजन ३.८ टन इतके आहे. आठ हत्तींच्या वजनाच्या इतके आहे हे वजन >> चांद्रयान-२ चंद्राच्या सर्व भागापर्यंत पोहोचणार आहे. आजपर्यंत चंद्राच्या सर्व भागापर्यंत पोहोचणारी मोहीम झालेली नाही. >> यात १३ भारतीय पेलोड असतील त्यातील ८ ऑर्बिटर, ३ लँडर आणि २ रोव्हर असतील. याशिवाय नासाचे एक पॅसिव्ह एक्सपेरिमेंट देखील असेल.

from Science & Technology News: Science News Updates, Science Technology News in Marathi | Maharashtra Times https://ift.tt/2jPxB3I